Lugo Sala remonta e imponse ao CD Sporting FS La Nucía (5-2)
O Lugo Sala volveu á senda do triunfo tras superar ao CD Sporting FS A Nucía, colista de Segunda División, nun duelo clave disputado no Municipal. Os lucenses, dirixidos por Guillermo Martínez, sobrepuxéronse a un inicio irregular e asinaron unha brillante remontada.
O encontro arrincou con dominio visitante. O rival presionou desde o inicio e atopou a súa recompensa no minuto 11, cando un gol en propia porta do porteiro Yerai adiantou aos alacantinos. Os locais non lograron impoñer o seu ritmo na primeira metade, o que obrigou ao corpo técnico a reformular a estratexia no descanso.
O Lugo Sala saltou ao segundo tempo cun enfoque renovado, máis agresivo e ofensivo. Porto marcou o empate cun espectacular disparo no minuto 27, pero as faltas volveron castigar aos lucenses. Juanito devolveu a vantaxe ao Sporting desde os 10 metros no 29’. Con todo, a reacción local foi inmediata: Iago Rodríguez igualou o marcador cun gol de estratexia tras un saque de esquina, e Álex Diz culminou unha excelente xogada colectiva para voltear o resultado (3-2).
Co marcador en contra, La Nucía apostou polo porteiro-xogador nos minutos finais, pero Álex Diz aproveitou para sentenciar o encontro con dous goles consecutivos nos minutos 38 e 39, selando un definitivo 5-2.
A vitoria supón un importante respiro para o Lugo Sala, que encara unha semana esixente. O martes 10 de decembro medirase ao Ribeira FS en cuartos de final da Copa Galicia, mentres que a próxima fin de semana viaxará a Melilla para enfrontarse ao Melistar na décimo terceira xornada de Segunda División.
Resultados da Xornada de Segunda División
FICHA TÉCNICA:
ADC Lugo Sala 5: Yerai, Iván Gemes, Alex Diz, Diego Nuñez e Porto – cinco inicial – Iago Rodríguez, Sául, Brunito, Miguel, Álvaro, Jose López, Javi, Pablito e Mitxel.
CD Sporting FS La Nucía 2: Kilihan, Muri, Abel, Kiwi e Manu García – cinco inicial – Matheus, Juanito, Miguel, Carlos, Óscar Ruiz, Alberto, Peloncha e Iván.
Goles: 0-1 Yerai (en propia meta) min.11, 1-1 Porto min. 27, 1-2 Juanito min. 29, 2-2 Iago Rodríguez min. 32, 3-2 Álex Diz min. 34, 4-2 Álex Diz min. 38 e 5-2 Álex Diz min. 39.
Árbitros: Mauricio Bravo Serrano e Javier Caballero Sandua.
Incidencias: Decimosegunda xornada da Segunda División de Fútbol Sala Masculina – Palacio Municipal dos Deportes de Lugo.
