O Lugo Sala saca a súa mellor versión e suma a primeira vitoria en casa (4-2)

O Municipal de Lugo acollía, no domingo das mozas, o encontro correspondente á cuarta xornada da Segunda División B, no que o Lugo Sala recibía o Salamanca FS, un rival que, a priori, non ía poñer as cousas nada fáciles.

Os pupilos de Christian Costoya saltaron á pista moi concentrados desde o asubío inicial, conscientes da importancia de sumar unha vitoria que lles permitise coller confianza e recuperar boas sensacións. E así foi. O conxunto lucense mostrouse máis acertado e intenso durante o encontro, soubo aproveitar as súas oportunidades e acabou deixando os tres puntos na casa cunha merecida vitoria por 4-2.

O encontro arrancaba con dous equipos moi intensos en defensa, o que dificultaba a creación de ocasións e impedía que ningún dos conxuntos lograse impoñerse no marcador. No minuto 5, tras varios achegamentos con perigo, o Lugo Sala conseguía adiantarse grazas a Luis Longo, encargado de poñer o 1-0. Porén, a alegría duraría pouco, xa que, apenas dous minutos despois, o Salamanca FS volvía establecer a igualdade no marcador.

A primeira metade estivo marcada pola igualdade e pola ambición de ambos os equipos, que amosaron desde o inicio as súas ganas de facerse coa vitoria. Co paso dos minutos, o marcador non volvería moverse, polo que a primeira metade remataría co 1-1 e todo por decidirse na segunda metade.

Tras o paso polos vestiarios, o Lugo Sala deu un paso adiante e saíu decidido a facerse co control do encontro. Nos dous primeiros minutos da segunda metade, un xogador do Salamanca FS era expulsado, unha situación que o conxunto lucense soubo aproveitar para volver adiantarse no marcador. Desta vez, Mitxel era o encargado de facer o 2-1.

Co paso dos minutos, o equipo salmantino non era quen de frear o xogo dos locais, mentres que as cousas non lle estaban saíndo como esperaba. Así, no minuto 28, cando parecía que o Lugo Sala perdía a posesión do balón, apareceu Javito para sorprender a todos cun disparo que se coou polo escuadro e ampliou a vantaxe ata o 3-1.

Porén, o encontro aínda tiña emoción por diante. Cando xa se entraba nos últimos cinco minutos, o Salamanca FS conseguía recortar distancias e poñer o 3-2 no marcador, engadindo tensión a un treito final no que o conxunto lucense vía cada vez máis preto a vitoria.

Nos dous últimos minutos, o equipo visitante optou polo ataque de cinco para tentar lograr o empate, pero a sólida defensa lucense impediu que o balón atopase o camiño da portería. Finalmente, a falta duns segundos para o asubío final, Miguel Muñoz roubou o balón e transformou a acción no definitivo 4-2, sentenciando o encontro.

Deste xeito, o Lugo Sala sumaba a súa primeira vitoria na liga, un triunfo moi necesario para recuperar confianza e coller boas sensacións de cara aos próximos encontros.

 

Resultados da Segunda División B

 

Ficha Técnica:

ADC Lugo Sala 4: Yerai, Pablito, Mitxel, Yago T., Pansi – tamén xogaron – Koke, Bruno, Miguel Muñoz, Sanfiz, Javi e Luis Longo.

Salamanca FS: Sergio, Moreiro, Sergio Hernández, Cristian, Jose – tamén xogaron – Alejandro, Pablo, Iván, Luis, Daniel, Dalmiro, Sergio Rodríguez.

Goles: 1-0 Longo (5′) , 1-1 Cristian (7′), 2-1 Mitxel (24′), 3-1 Javi (28′), 3-2 Cristian (34′), 4-2 Miguel Muñoz (40′)

Árbitros: Mayra Camila Araujo, Sergio López Riveiros e Diego Agustín Montoya Montero.

Incidencia: Xornada 4 da Segunda División B.